之前一直介紹左好多深水埗有名既糕點鋪～小菜館～甜品店和茶餐廳既俾咁多位．今次想介紹啲特別啲既菜色俾各位，就係～山東餃子館～啦！點解係特別既菜色呢？因為好多人諗起餃子都係諗食唔飽又無乜其他野食都未必會行入去．但係呢間餃子館除左餃子之外，重有好多其他好味既小菜食架．呢間山東餃子店已經係深水埗既第三間分店啦，佢能夠係深水埗開到三間店鋪，一定有其獨特之處．
呢個就係呢度有名既餃子，呢度好多隻餃子都好出名，當中小編最喜歡既係紅油抄手，唔太辣又有啲甜甜地，好適中．呢度有香芹鮮肉水餃～津白鮮肉餃～番茄鮮肉水餃～金玉滿堂鮮肉水餃等多種不同類型既水餃任你擇，每日黎試一種水餃都有排你試．而呢度出名既係水餃o既種類，同埋皮簿饀多同汁多．
唔鐘意食水餃都唔緊要，因為呢度重有其他出名既食品～麻醬雞絲粉皮！呢度既麻醬好香好滑又夠濃麻味，撈麵食真係一流，而且粉皮唔太厚又滑，令人好想食多碟．再講，呢度除左個麻醬好味之外，啲麵都好煙韌同彈牙．所以話唔鍾意食餃子既朋友都有其他既選擇．
另外就咁叫個麻醬拌麵都係一個好好既選擇黎架，因為有麻醬加埋咁煙韌彈牙既麵真係好好味，特別係夏天食呢種麵真係零舍不同！
最緊要係Ｏ係呢度食到飽都只不過係三四十蚊，真係又平又正之選，黎得呢度食既朋友對佢地既水餃都係讚口不絶架！
地址：深水埗元州街81C號舖（分店）
